الأحد، 30 ديسمبر، 2012

طريقك للتدريب في صيدلية ـ ج2

في التدوينة اللي فاتت ، عرفنا إيه الأسباب والمميزات اللي ممكن تكتسبها لما تدرب في صيدلية .. والنهارده هنتكلم عن ( الخطوات الأولى ) في الطريق .

1- أنزل أتدرب فين ؟

يفضل إنك تدرب في صيدلية فيها حد هيشرف عليك ، عنده استعداد انه يستحمل أسئلتك الكتير .
كمان الأحسن إنك تنزل في صيدلية عليها اقبال ( شغلها كتير يعني ) لأن ده هيساعدك إنك تتعلم بسرعة وتتعامل مع الأدوية باستمرار .

لكن لو مفيش صيدلية معينة في بالك .. مفيش مشكلة .. روح لأقرب صيدلية عندك .. واطلب انك تقابل الدكتور .. واشرحله إنك طالب في سنة سادسة وعاوز تتدرب .. الغالب الأعم بيكون متعاون جدا ومتفهم جدا

( ودي في نظري أصعب خطوة لأن البعض مننا بيخاف إن الدكتور يرفض فبيفضل مكانه ومش بياخد الخطوة الأولى .. روح خد الخطوة .. المسألة مش صعبة قوي زي ما انت فاكر ) .



2- محتاج إيه معايا ؟



- هتحتاج كشكول صغير تكتب فيه الملاحظات اللي انت بتتعلمها .
- أطلس أدوية " وأنا برشح لك أطلس 2 " هتلاقيه في مكتبة المنار عندنا .
- كتاب تقرأ فيه في أوقات فراغك هناك
( بعد فتره احتمال تحس بملل من كتر القراية في الأدوية .. غير جو واعمل حاجة تانية وانت في الصيدلية ^_^ )

3- هتعلم إزاي ؟



بالنسبة لي أنا الدكتور اللي بيشرف عليا كان رئيس قطاع في شركة أدوية كبيرة ، فبدأ معايا من الصفر ,, واقترح عليا اقتراح ممتاز لكن البعض يمكن يستصعبه شوية ..
الصيدلية متقسمة حسب الـ Body Systems

1- Antibiotics
2-Analgesics
3- Vitamins & Supplementation
4- GIT
5- Respiratory
6- المراهم والكريمات
7- القطرات
8- الحقن
9- أدوية الغدد والقلب .
10- مستحضرات التجميل .

هتبدأ انت مثلا بقسم الـ Antibiotics هتبدأ تطلع كل دواء وتقرا الـ Leaflet بتاعته وتعرف الآتي :

- Generic Name
- Trade Name
- Indications
- Doses
- Forms

الطريقة دي صعبة شوية .. ويمكن تكون تقيلة حبتين .. لكن بتحس إنك عايش مع الدواء .. وبعد فترة بتلاقي الأدوية بتتكرر مع اختلاف في الاسم التجاري مش أكتر .
بعد فترة من تريبك في الصيدلية هتبدأ تحس إن تقدر تشيل المسؤولية .. إنك تقدر تقف في الصيدلية حتى لو مش معاك الدكتور المشرف عليك ( الفترة دي بتختلف من واحد للتاني وفقا لكثافة الشغل كل يوم .. ووفقا كمان للـ Attitude بتاعك ) .

بمجرد ما توصل للمرحلة دي ممكن تبدأ تدور على صيدلية تانية تشتغل فيها بقى مش تدريب .

4- ودي ممكن توصل ليها إزاي ؟


- السؤال المباشر : يعني تنزل الصيدليات المحسطة بيك وتسألهم عن وظيفة .
- زملاءك اللي في امتياز : كتير منهم بينزل صيدليات وبيعرف مين الصيدلية اللي محتاجة .
- جرنال الوسيط .
- موقع شغلانتي . ( شوف قسم مساعد صيدلي ) .

أتمنى أكون أفدتك .. ولو فيه أي استفسار أنا تحت امرك ^_^

ردود الأفعال:

1 التعليقات :

إرسال تعليق