السبت، 15 ديسمبر، 2012

طريقك للتدريب في صيدلية ـ ج1

كتير مننا بيفكر ينزل تدريب في صيدلية خلال الأجازة ، في البوست ده هشاركم أهم الحاجات اللي لازم تكون ملم بيها ..

أولا : انت نازل الصيدلية ليه ؟
قبل ما تبدأ في أي هدف أو مشروع لازم تكون عارف بالظبط إنت عاوز منه إيه .. أو هو مهم بالنسبة لك ليه ..
دي بعض الأسباب اللي ممكن تخليك محتاج فعلا تنزل صيدلية ..

1 - تعرف الـ Trade Names

خلال فترة دراستنا الطويلة .. اتعرضنا لأساليب العلاج المختلفة .. بأنواع كتير من الأدوية ..
الفكرة إنك بتتعلم الـ Generic Name مش الـ Trade Name .. طيب بكرة وبعده لما المريض يقولك أنا أخدت " الدوا الفلاني " و من ساعتها عملي " كذا وكذا " .. أكيد مش هيقولك غير الـ Trade Name .. عيب جدا بقى ساعتها لما تبقى قاعد مش فاهم منه حاجة .. وده جزء هتغطيه بعد فترة قصيرة من شغلك في الصيدلية .

2 - تكون ملم بأسعار الادوية 

مش بقولك هتحفظها لكن على الأقل من كتر تعاملك مع الأدوية في الصيدلية ..هتبدأ تلم بأسعار الأدوية الموجودة ، هتبدأ تعرف إلى حد ما مين العلاج اللي ممكن يكون مناسب للمريض اللي جايلك وفقا لحالته المادية .. ( مش معنى إني إنسان بسيط إني ما أتعالجش )

3 - تعرف بدائل الأدوية .. ومين ممكن يحل محل مين

4 - هتتعلم بعض المهارات " البسيطة "

زي الأنواع المختلفى للحق بدئا من العضل لحقن تحت الجلد .. للأنسولين .. غير كمان الغيارات على الأنواع المختلفة للجروح ( ما تستغربش إنك ممكن تفك سلك في الصيدلية لأن كتير مش بيقدر يروح للدكتور ويدفع فيزيتا مجرد عشان يغير على الجرح بتاعه ) .

5 - الإختلاط الحقيقي بالسوق

من أهم الحاجات اللي هتتعلمها " تلقائيا " إزاي تتعامل مع الناس ، إزاي تشرح له إزاي يستعمل الدواء ، وهتقابل كتير .. المثقف والبسيط .. لسه امبارح مريض بصرفله " كيتوفان 50 " وهو مصر إن الدوا ده بيسبب الإدمان ( ^_^ ) .. وفين على ما اقتنع إن المعلومة دي غلط .

6 - بناء الإحساس بالمسؤولية 

لما تشيل صيدلية فيها عقارات بالآلاف .. تستقبل طلبيات .. وتكتب نواقص الدواء .. وتنظم التعامل مع المرضى .. وتحسب تكلفة كل روشته .. وتراجعها مع الدواء لحسن تكون صارف جرعة مختلفة .. كل ده مع الوقت بيخليك تكتسب خبرة وثقة بالنفس

7 - الربح المادي

في الصيدلية انت بتتحاسب بالساعة .. لو انت عندك خبرة بيزيد سعرك .. الساعة بيتراوح سعرها من 80 جنيه ل 100 جنيه في الشهر ( وأحيانا ممكن تزيد ) ..

مثال: لو اشغلت كل يوم 10 ساعات .. لمدة شهر .. وكنت بتتحاسب بـ 100 عالساعة في الشهر .. يبقى حسابك 10 ساعات * 100 = 1000 جنيه في الشهر .

أتمنى أكون أفدتكم .. وعلى وعد بلقاء تاني ^_^

ردود الأفعال:

0 التعليقات :

إرسال تعليق